Dalagang Pilipinhon

ni Carlos P. Garcia

Maga mata mo maoy naghatag

Mga bulak sa akong kitara,

Us sa kasingkasing ko awit sa guma,

Pagatauban man ugaling sa mga luha,

Ako intawon inday sa Birhen manimasin

Nga didto dili unta mangatundag

Ang akong paglaom ug akong himaya.

Baba mo pula-pula sa sa putot

Sa rosas nga maoy pagbuklad

Ug kong ikaw mopahiyom

Akong Makita ang tinagong bahandi

Sa imong baba

Ang duha ka lumbay sa mga mutya

Nga daw ganghaan ngadto sa himaya,

Ug kong ikaw mokatawa ug motalidhay

Daw among madungog ang buhagay

Sa usa ka buasy sa bulawanon nga kalipay!

Dalaga sa akong kaliwat – lahi nga tabunon

Ikaw ang tag-iya sa kasingkasing ko’g kinabuhi

Ang imong kaanyag maoy milamdag

Sa mangitngit nga dalan sa akong kalag;

Ug kong si adlaw magdumili sa pagsanag

Kita ko gihapon ang nindot mong larawan

Sa bughawng langit sa akong dalindaman.

Dalagang Pilipinon,

May lawas kang nindot, bigot ug tigson,

Mga lalik sa dughan mo nga lison

Nagbihag kanamo ngadto sa kaluhang moto,

Diin among nalantaw ang himaya sa paraiso,

Ayay lawas!... Misingit ang hangin mabugon

Ug hangtod ang bingo nga imong kaligoanan

Nga nakakita ug nakahikap sa mga kurba

Sa lawas mong dili tinabonan,

Misulat sa sulog sa lilo ning mga pulonga:

Pagkatam-is ug katahom mo, babayeng Pilipina.

Ug kong ako sa usa pa ka batong wagas brilyante,

Buot kong dugmokon and akong kaugalingon

Sa usa ka libong peraso

Aron tuhogon ug mahoimong pendante

Nga ika dayandayan sa dughan mo.

Ug kon ako usa pa ka tanaman

Nga naghambinay sa mga bulak

Humot ug luming

Gasaan ko ikaw usa ka kolyar sa mga bulak

Kinutlo didto’s paraiso sa akong mga damgo

Aron lamang idayandayan sa liog ug buhok mo.

Apan Ay!... ako usa lamang ka tawong mortal,

Kabos ug gikawang mga bahandi

Apan gihiguma ko ikaw babayeng Pilipinhon,

Gikan sa lintunganay sa bulawan kong pagbati

Ug kong kanako isalig mo ang palad mo’g kinabuhi,

Dad-on ko ikaw sa akong payag

Ug didto salag sa atong gugma

Ikaw bugtong mutya ko ug hari

Imong kasalo pag-inom sa alak sa kalipay

Ug imong ka-unong paglad-ok sa apdo sa kasakit

Hangtod atong masampong ang sidsid sa langit.